મનુષ્યના ઉમળકાઓનો છે ઘૂઘવતો વૈભવ!
નભની ઊંડીઊંડી ઉદાસીઓને લૂછવા
નભની ભડભડતી એકલતા ભૂંસવા
જુઓ, મનુષ્યો-
ઉમંગના રંગોમાં ઝબકોળી-ઝબકોળી
પ્રીતિની પીંછી ફેરવતા ઉજ્જડ-ઉજ્જડ નભમાં.
ઉજ્જડ નભને નમણું નજરાણું
ઉર્ફે આ પતંગ!
હરેક જણના પતંગ પર
લખિયો છે આ સંદેશો કે
હે નભ! તું નીચે આવ!
આવ નીચે ને જરાક હળવું થા….
માર નગારે ઘા,
ગમગીનીનો ગોટો વાળી
જલદી કૂદ કછોટો વાળી
ઓચ્છવના આ રંગકુંદમાં ડૂબકી મારી ગા!
આવ, આવ, તું જરાક નીચે આવ ને હળવું થા…
આભ, તને
આ પતંગ રૂપે છે નિમંત્રણ-
નીચે આવી ચાખ ઉમળકો,
ચાખ જુવાની, ચાખ લાગણી
ચાખ પ્રેમ ને ચાખ હૃદયના ભાવ
આભ, તું જરાક નીચે આવ…
પતંગ
દેવિકા ધ્રુવ
વિશ્વના આકાશમાં,
ચગતા પતંગ જેવા આપણે.
કોઈ ફૂદડી,કોઈ ઘેંશિયો,
કોઈ જહાજ,કોઈ પાવલો.
હવા મુજબ,
કમાન અને કિન્નારને,
શૂન્ય/એકના માપથી
સ્થિર કરી, દોરીના સહારે,
ખરી ઉડાન કરીએ છીએ ખરા?
કદીક પવન સ્થિર,કદીક ભારે,
હળવેથી સહેલ ખાઓ,
કે ખેંચમખેંચ કરો.
પણ ઊંચે જઈ, ન કપાય
કે કોઈથી ન મપાય,
છતાં સૌથી વખણાય,
એવી ઉડાન કરીએ છીએ ખરા?
—Devika Dhruva. | ddhruva1948@yahoo.com | http://devikadhruva.wordpress.com
વેબ ગુર્જરી 