ઇશ્વરના ઇ મેઇલ – ૨૧

એકલો જાને રે..

નીલમ  હરીશ દોશી

ગમતું તુ બેસવું, પણ લાગ્યું વસમું, કીધું મેં નાથ, હવે જાઉં ?
કાં ? એક બાજુમાં સુવાવડી વહુને સમજાવી રાબ જરા પાંઉ
ને સામી શેરીની મંદિરની ટેકવાળી આંધળી ડોશીને દોરું..

મુકુન્દરાય પારાશર્ય

---

પ્રિય દોસ્ત,

મને તારી એક વાત જરા પણ નથી ગમતી.તને ઘણી વાર સારી વાત, સારું કામ કરવાની ઇચ્છા જાગે છે. પણ થોડી વારમાં તું જાતે જ બહાનું શોધી કાઢે છે કે મારા એકલાથી શું વળવાનું ? હું એકલો એમાં  શું ફરક કરી શકવાનો ?  આવી કોઇ દલીલ જાત સાથે કરીને છટકબારી શોધી લે છે. અને પછી નિષ્ક્રિય બનીને બેસી જાય છે.દોસ્ત, તારી આ વાત સાથે હું જરા પણ સંમત નથી.

દોસ્ત, જરા શાંતિથી વિચાર.  તારી જેમ દરેક વ્યક્તિ આવી દલીલ કરીને નિષ્ક્રિય બનીને બેસી રહે તો ? એક એક વ્યક્તિ મળીને જ સમાજનું નિર્માણ થાય છે ને ? દરેક વ્યક્તિ પોતાનું આંગણું સાફ કરી નાખે તો આખી શેરી આપોઆપ સાફ થઇ જાય ને ? દોસ્ત, અન્ય કોઇ શું કરે છે એની ચિંતા કર્યા સિવાય એટલીસ્ટ તું તારી જાતને તો પ્રામાણિક્તાથી સુધારી શકે ને ?

હું એકલો શુ  કરી શકું એ બધી વાંઝણી વાતો છે. મનને છેતરવાની છટકબારીઓ છે.

ધૂળમાં આળોટીને એક ચપટી ધૂળ રામના સેતુબંધમાં ઠાલવતી ખિસકોલીની વાત તું કેવી ભાવથી કહેતો કે વાંચતો ફરે છે ?  કે પછી જટાયુની વાતથી પણ તું કયાં અજાણ છે ? રાવણની શક્તિથી તે અજાણ નહોતો જ. પોતે હારવાનો જ હતો એની પણ તેને જાણ હતી. પરંતુ પોતાના દેખતા કોઇ સીતાજીને લઇ જાય એ તેને સ્વીકાર્ય નહોતું. અધર્મ સામે લડવું એ તેનો ધર્મ હતો, તેનું કર્તવ્ય હતું.પરિણામની પરવા કરવા તે નહોતો રોકાયો. દોસ્ત, સમજાય છે તને મારી વાત ? મારા એકલાથી કંઇ ન થઇ શકે.આવું વિચારીને તારા કર્તવ્યમાંથી છટકી ન શકાય.દોસ્ત્, તને, મારા પરમ  સર્જનને  એ ન શોભે.

તું તારા  રોજિંદા જીવનમાં શકય તેટલી શુચિતા, પ્રામાણિકતા, કર્તવ્ય નિષ્ઠા લાવી શકે .રોક એકાદ નાનકડું પણ સારું કાર્ય તારે હાથે થાય એ જ મારો રાજીપો, એ  જ મારી ઇચ્છા, એ જ મારી પૂજા. રોજ એકાદ વ્યક્તિને નિસ્વાર્થભાવે કોઇ નાનકડી મદદ તું ન કરી શકે ? કોઇ એકાદ અ ચહેરા પર તું નાનકડું સ્મિત ન લાવી શકે..? તારી પાસે મારી આટલી  અપેક્ષા કંઇ વધારે પડતી કહેવાય ?

દોસ્ત, મારી આટલી આશા પણ પૂરી નહીં થાય ?  મારી મૈત્રી માટે તું આટલું પણ ન કરી શકે ?

લિ. તારો મિત્ર ઇશ્વર..

પ્રાર્થના એટલે ઇશ્વર સાથે વાર્તાલાપ કરવાનો વાયરલેસ વ્યવહાર

જીવનનો હકાર.

ગ્રન્થિથી મુકત કરે તે સાચો ગ્રન્થ.

---