ધંધેકા ફંડા
ઉત્પલ વૈશ્નવ
મિટિંગમાં મહત્ત્વની ચર્ચા ચાલી રહી હોય ત્યારે જ આપણા ફોનની ઘંટડી ધણધણવા લાગી હોય એવી ઘટના તો કેમ ભુલાય?
કાર્યસ્થળ પરના આવા છબરડાઓના તો આપણે બધા ક્યારેક શિકાર બન્યાં જ હોઇએ છીએ !
વ્યાવસાયિક સંદર્ભમાં કાર્યસ્થળ પરના શિષ્ટાચારનું કંઈ મહત્ત્વ ખરૂં?
કાર્યસ્થળ પરનો શિષ્ટાચાર કાર્યસ્થળ પરના આપણા વ્યવહાર અને વર્તણૂક અને આપણી પાસેથી રખાતી અપેક્ષાઓની લઘુતમ સાધારણ સીમારેખા દોરે છે.
સત્તાવાર મિટિંગ માટે કોઈ ભડકાઉ રંગનાં કપડાં પહેરીને આવે તો કેવું લાગે!
કે પછી મિટિંગમાં તમે પૂરી તૈયારી વગર ગયાં હો અને પછી જે ફાંફાંફાંફાં મારવાં પડે તેને કારણે તમે તો શરમજનક હાલતમાં મુકાઓ જ પણ હાજર રહેલ બીજાં બધાંનો સમય બગડે એટલે તેમની નારાજગીનો ખોફ પણ વહોરવાનો આવે ત્યારે કેવી હાલત થાય!
ચા-કોફી કે બપોરના જમવા માટેના વિરામ સમયે બિનૌપચારિકતા કર્મચારીઓમાં સહઅસ્તિત્વની ભાવના પ્રેરી શકે. પરંતુ, શિષ્ટાચાર વિનાનું કાર્યસ્થળ ત્યાં માટે આવશ્યક એવી એકાગ્રતા અને ઉત્પાદકતાનાં માટે જરૂરી વાતાવરણને અવળી અસર કરે છે.
આ શિષ્ટાચારમાં બૉસ કે સહકર્મચારીઓ સાથે ‘પ્લીઝ’ ‘થેન્ક યુ’ ના યથોચિત પ્રયોગની સાથે સાથે એટલી જ નમ્રતા અને સાલસતા ચા-વાળા કે લિફ્ટ્મેન કે સિક્યુરિટી ગાર્ડ સાથે પણ આવશ્યક છે.
જોકે શિષ્ટાચાર અહીંથી શરૂ થઈને અહીં જ પુરો પણ નથી થતો.
સહકર્મચારીઓ સાથે વાતચીતમાં કરાતા શબ્દ પ્રયોગ, તેમના સમય અને કામનું સન્માન, મોબાઈલ ફોનનો ઉચિત ઉપયોગ , સામાજિક માધ્યમોની અંગત બાબતો માટે ઉપયોગ ન કરવો, મિટિંગ માટે હંમેશાં પુરી તૈયારી કરીને જવું, આપણા કામની જગ્યાને સાફસુથરી રાખવી જેવી કેટલી નાની અને મોટી બાબતો અપેક્ષિત શિષ્ટાચાર માટે આવશ્યક બની રહે છે.
તમારા કામમાં તમે ભલે ને ગમે એટલાં મહારથી હો, પણ શિષ્ટાચારના છબરડાઓ તમારાં કૌશલ્ય વિશેનાં માનને પાયામાંથી નુકસાન કરી શકે છે.
શિષ્ટાચારની ચુક મહત્ત્વના ગ્રાહકને ખોઈ બેસવા જેવી કે અગત્યનાં કામને સમયસર પુરું ન કરવી શકવા જેવી બહુ મોંધી પડે એવી કિંમત ચુકવવામાં પણ પરિણમી શકે છે.
પથ્થર પર લકીર જેવી વાતઃ વ્યાવસાયિક શિષ્ટાચાર સફળતાની ગુપ્ત ચાવી બની શકે છે.
તેને કારણે કામ સરળ બની શકે છે, યોગ્ય જગ્યાએ યોગ્ય સમયે કાયમ માટે સારી છાપ પડી શકે છે, અને …..કારકિર્દીના માર્ગ પરના અવરોધો દૂર થઈ શકે છે.
ચાલો, કાર્યસ્થળ પરના શિષ્ટાચારને આપણી કારકિર્દીની સફરમાં હમરાહ બનાવીએ….
આ શ્રેણીના લેખક શ્રી ઉત્પલ વૈશ્નવનો સંપર્ક hello@utpal.me વીજાણુ સરનામે થઇ શકે છે.
વેબ ગુર્જરી 