૨૦૨૦ની રક્ષાબંધને…

આ છેલ્લી છે, એ જાણ સાથે હૈયું હચમચાવીને, રાખડી બાંધી’તી.
છેલ્લી ન રહે, એ ભાવ સાથે  ઘૂંટ ગટગટાવીને રાખડી બાંધી’તી.

ચાહ એવી ખૂબ જાગે, ચમત્કાર થાય  ને સઘળું સારું થઈ જાય પણ
ખોટા, જૂઠા દિલાસા સાથે, કડવું એ સચ પચાવીને રાખડી બાંધી’તી.

જાણ્યું’તું સમય બળવાન છે, પણ કોપાયમાન આવો? સાવ કટાણે?
વિધિની વક્રતાનાં દ્વારો ખૂબ ખટખટાવીને રાખડી બાંધી’તી.

મજબૂત છીએ, આવજે પણ પીડા વિના મળજે ભાઈને, માની જેમ જ,
હકભર્યા હુકમના સાદ સાથે, બહુ જ મન મનાવીને   રાખડી  બાંધી’તી.

जानामि सत्यं न च मे स्वीकृति, એ લાચારી ને વેદનાને હરાવી
રુદિયે શ્રદ્ધાસભર સૂતરનો તાર કચકચાવીને રાખડી બાંધી’તી.

પણ…  આખરે સપ્ટે. ૨૦ ૨૦૨૦ની રાત્રે ૧૧.૧૫ વાગે “પાંચમની છઠ્ઠ નથી થવાની” એમ કહેતાં ભાઈ શ્રી નવીન બેંકરે જીવનમંચ પરથી વિદાય લઈ જ લીધી.