વ્યંગ્ય કવન: અત્તર રહી જાય નહીં ફૂલમાં !!!

– કૃષ્ણ દવે

અત્તર રહી જાય નહીં ફૂલમાં !!!

બીજું શું કરવાનું સ્કૂલમાં ?

આખ્ખાયે ધંધામાં રાખવાનું ધ્યાન,

ક્યાંય અત્તર રહી જાય નહીં ફૂલમાં.

બીજું શું કરવાનું સ્કૂલમાં ?

ભણવાનાં કારખાનાં ધમધમતાં રાખવાની

આપું બે ચાર તને ટીપ ?

માછલીની પાસેથી ઉઘરાવ્યે રાખવાની મોતી ભરેલ કંઈક છીપ.

માસુમિયત જોઈ જોઈ લાગણીનું સપનું પણ જો જે આવે ન ક્યાંક ભૂલમાં ?

બીજું શું કરવાનું સ્કૂલમાં ?

સીધેસીધું તો કદી મળવાનું નહીં થોડું બેસાડી રાખવાનું બ્હાર

થનગનતી ઇચ્છાને લાગવું

તો જોઈએ ને કેટલો છે મોટ્ટો વેપાર !

ઊંચે આકાશ કૈંક દેખાડી ડાળ

પાછુ પંખીને કહેવાનું ઝૂલ મા.

બીજું શું કરવાનું સ્કૂલમાં ?

ધારદાર ફતવાઓ પાડવાના બ્હાર અને ભાષણ પણ કરવાનું લિસ્સું,

અર્જુનને પંખીની આંખ જ દેખાય એમ તારે પણ વાલીનું ખિસ્સું.

શિક્ષણ નહીં, ફાઈવસ્ટાર બિલ્ડિંગ જરૂરી છે સૌથી પ્હેલા તો સંકુલમાં.

બીજું શું કરવાનું સ્કૂલમાં ?

———————————————————————————

વેબ ગુર્જરી પર પ્રકાશન અંગેની વિચારણા સારૂ આપની વ્યંગ્ય કવિતા નીચેનાં વીજાણુ સરનામે પદ્ય વિભાગનાં સંપાદકોને મોકલી શકો છો-

સુશ્રી દેવિકા ધ્રુવ – ddhruva1948@yahoo.com
સુશ્રી રક્ષા શુક્લ – shukla.rakshah@gmail.com